شرح تمرين المتوازي بالكامل وازاى تلعب متوازي


شرح تمرين المتوازي بالكامل وازاى تلعب متوازي

تمرين  البيج بوس بالنسبة للصدر

التمرين ال  بيجيب_من_الاخر ? ,,, التمرين ال ملوش زي

شرح تمرين المتوازي بالكامل و ازاى تتعلم تلعب متوازي

تعالي وركز معانا يا مبتعرفش تلعب متوازي ,,,

المقال الـ كل الصفح سرقته ونسبته ليها 😀

من افضل التمارين اللى ممكن تعملها ف حياتك كلها من اول يوم جيم ورياضة … لحد آخر يوم تتمرن فيه  

التمرين دا سحر عشان تقريبا مبيسبش عضلة متشغلهاش

في الجزء العلوي “من جسم الإنسان ” نصك ال فوق “

بس النهاردة عايز اعرفكم ع  تركية صغيرة هتفرق معاك بعد كده وانت بتتمرن ,,

وتعرف ازاى تتمرن صح ,,, عشان  تستهدف صح العضلة اللى انت عاوزها  بالظبط

وهنعرف ونتعلم ازاى تلعب متوازي ,,, وتعرف الخطوات ال هتخليك تقدر تلعبه

بسم الله وركز معايا كويس ,, :-

دلوقتي المتوازي ممكن يتلعب بطريقتين :-

1 – زي الصورة المكتوب عليها ” 1 ” … وهي انك تلعب وانت جسمك مفرود زي  المسطرة ” I “

بدون انحناء للامام … وف التكنيك دا … اكتر العضلات يكون عليها ضغط وحمل هي عضلة

”  التراي Triceps ” ,,, يعني انت كده تستهدف خصوصا عضلة ” التراي “

2 – زى الصورة المكتوب عليها ” 2 ” … وهى انك تلعب وانت جسمك مايل لقدام ” / ” وعامل انحناء للامام … ف الوضع دا عضلة ال “chest ” “الصدر “

هي اكتر عضلة بيكون عليها حمل وضغط ….

المتوازي ف اى وضع من الأوضاع بيشتغل معاه شوية مجموعات من العضلات

” الكتف خصوصا الأمامي – المجنص – الترباس السفلي – الباي سيبس “

عضلات مساعدة أو عضلات  للتثبيت أثناء الحركة ,,,

متوازن البنش

انما :

– انت عايز تركز ع الصدر … يبقى تميل لقدام وانت بتلعب

– عايز تركز ع الترايسبس … يبقى تلعب وانت مفرود

المتوازي سحر لتظبيط ورسم وشد عضلات الجسم …

والمتوازي كمان سهل انك تعمله ف البيت عندك ف الحيطة عصايتين بيتركبوا ف الحيطة وبيبقي 10/10 ,,,و هينفعك كتير ?

طيب انا مبعرفش العب متوازي ,,, اعمل اى ? و اتعلم ازاى ؟

1 – ف الجيمات الكبيرة او الغالية بمعني اصح ? يكون في جهاز يساعد

” متوازي بأوزان ” ,,, بيكون فيه اوزان ” بلاطات ” بيكون فكرتها انها تقلل المجهود اللى انت بتعمله ,,, وانا  ترفعك و  تساعدك   يعني مثلا انت المفروض عشان تطلع وتنزل تعمل مجهود وجهد مقداره ” 50 ” ,,, بالوزن ال هتحطه انت هتعمل مجهود وجهد

” 10 – 15 ” فقط ,,, يعني هتعرف تلعب المتوازي ,,, والفكرة بقي والشطارة منك

انك تقلل كل شوية  حجم المساعدة ,,, لحد ما توصل لانك مش بتستخدم اى وزن للمساعدة

وبقيت تجيب التمرين بالكامل لوحدك بدون مساعدات , بدون اوزان مساعده .

2 – ف جهاز جميل جدا ” بس نادر شوية مش موجود في معظم الجيمات ” ,,,

الجهاز دا عباره عن أوزان انت بتزقها ,,, يعني ف ” قبضتين ” زي بتوع المتوازي

محطوطين لجهاز وانت بتحط وزن ,,, وتزق القبضتين دول

” بتزق الوزن ” اكنك بتلعب متوازي بجسمك بالظبط ,, بس بدل ما الجسم هو ال بيطلع وبينزل ,,, الجهاز ” القبضة ” هي ال بتطلع وبتنزل ,,, وميزة الجهاز دا

هي انك ممكن تزود وزن اكتر واكتر ,,, لدرجة وزن ” أثقل من وزن جسمك “

يعني لو وزن جسمك 90 مثلا الجهاز بيديك فرصة انك تعمل التمرين ب وزن

” اكبر من 90 ” 100 – 120 ,,, الي اخر الجهاز ” ع حسب قوتك ” .

3 – وهي الأشهر ,,, وال النسبة الأكبر من المتابعين محتاجين الشرح بتاعها

وهي ” ان مفيش اى جهاز مساعد ,,, هو يدوب المتوازي بس وبدون اى مساعدات “

اعمل اى ؟

= مطلوب منك اولا وثانيا انك تتعلم  الثبات , انك تثبت ع المتوازي

تتعلم تثبت ” 2 ث ,,, 5 ث ,,, 10 ث ” ,,, وتعمل الثبات دا سواء تقدر تثبت 2 ث ولا 5 ث ,,, تعملها مجاميع ,,, 5 – 6 مرات ,تثبت وتنزل وهكذا

” المرحلة دي هتاخد منك وتستمر عليها ,,, اسبوع – 10 ايام “

= اول لما توصل انك قادر تثبت اكتر من 8 ث ,,, ابدا انزل

 ربع  نزله ,,, 5 مرات ” عدات ” ” ربع نزله ” ف 3 – 5 مجاميع ” أدوار “

” المرحلة دي هتاخد منك 3 – 4 ايام “

= ابدأ خلي الربع نزله ,,,  نص نزله ,,, وانزل نص نزله 3 – 5 عدات

ف 3 – 5 مجاميع ,,, ” المرحلة دي استمر عليها اسبوع “

= بعد الأسبوع ,,, هتبدأ تنزل عدة كاملة ,,, تجيب عدة كاملة من الاول للاخر

وعاوزك ف اول اسبوع ف المرحلة دي ,,, متكترش عن 5 عدات

” 3 – 5 عدات ” ف ” 3 – 5 مجاميع “

= بعد اسبوع وانت بتجيب 3 او 5 عدات كاملين ,,, هتلاقي نفسك قادر تجيب 8 – 10 عدات ,,, والاسبوع الي بعده هتلاقي نفسك بقيت زي المكنه ,,, وبدل ما بتاخد وقت طويل وانت طالع ونازل ,,, بتطلع وتنزل بسرعة وبسهولة ومرونة .

= مبروك ,,, انت بقيت بطل ,,, بقيت  شبح ? ,,, ايوة ال بيعمل متوازي لوحده بدون مساعدات دا شبح ? مش اى كلام .

 

  وانت ف فترة التعلُم ,,, تتلعب المتوازي 3 ايام ف الاسبوع ع الاقل

يعني لو تنزل الجيم 5 ايام تلعبه 3 ايام من ال 5 ,,, ولو بتنزل 4 تلعبه 3 من ال 4 .

*** الناس  المتقدمين ,,, واصحاب المستويات العالية ,,, تقدر تلعب المتوازي يوميا في بداية التمرين بعد التسخين ,,, او ف اخر التمرين ,,,

و لو حابب تزود الصعوبة والوزن ,,, تقدر تشيل وزن ” دمبل “بين رجلك ,,,

او تحط سلسلة الاوزان حوالين رقبتك ” الجنزير ” ,,,

الكلام هنا لاصحاب القوى والكتل العضلية القوية  فقط ,,, !

اخر حاجة ,,, ونقطة مهمة : ???

” لو عندك وجع في الكتف جديد ,, او طازه بالبلدي … او لو بتحس بوجع بايخ ومؤذي في كتفك وانت تلعبه ” حاسس انك متضايق وانت بتلعب ,, ف وجع رخم “

… متلعبش متوازي ابدا لحد ما الوجع يخف وينتهي تماما ,,, عشان المتوازي محتاج كتف قوي ومفيهوش اى مشاكل “

“”””””””””””””””

يارب يكون مقال كامل ووافي ,,, وعرفنا كل حاجة عن المتوازي

وازاى تتعلم تلعبه , واى هي تفاصيل التكنيك بتاعه

 

 المقال برعاية دكتور شيفو

الكاتب:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *