رعشة اليد اثناء التمارين
رعشة اليد اثناء التمارين ,,, السؤال المستمر في لعبتنا ,,, والسؤال ال سأله كل واحد نزل الجيم
انا ليه ايدي بتترعش وانا بتمرن ؟؟
بسم الله ونركز سوا
الجيم دا عباره عن أحمال وأوزان وتمارين مقاومة ,,, والحمل دا ال بيشيله يتحمله هو
جهازك العصبي العضلي
” العضلات + الأعصاب ال تمد العضلات الإشارات والتنبيهات “
انت ف العادي وقبل ما تنزل الجيم ,,, بيكون جسمك وعضلاتك واعصابك شغاله ع خفيف بتشيل حاجات خفيفة ,,, يدوب كتب ,, او شنطة الشغل او شنطة الكلية أو المدرسة .
فأنت بتيجي تبدأ تنزل الجيم وتبدأ تشيل اوزان وتبدأ تعمل تمارين قوية وبتبدأ تلاقي موضوع الرعشة ,,, وتلاقي أن ايدك بتتهز وانت طالع بالدمبل او وانت بتشيل البار او رجلك بترقص وانت بتلعب اسكوات وبتبدأ تزعل وتضايق وتفتكر ان ف حاجة غلط ! افهم واعرف ان دي طبيعة بشرية دي زي مرحلة التمهيد والاعداد كل الموضوع موضوع وقت
” جهاز العصبي العضلي ” محتاج شوية وقت عشان يبقى اقوى واشد اكتر انت كنت بتشيل كام كتاب او كام شنطة وخلاص ,,, فبناء عليه دا ال جسمك متعود عليه ودا هو الحد بتاعه .
لكن ميزة الجسم البشري أنه قابل للتطور جدا ,,, ومع التمرين والاستمرار يتحسن وبيعلي فى مستوياته وفى كفاءته وقوته .
الموضوع عباره عن نصين نص عضلي ونص عصب وبناء عليه
الخلاصة من د شيفو :-
– عضلاتك قابلة للتطور جدا ,,, وزي ماهي متعوده ع انها تشيل حاجات خفيفة وبسيطة فى وقت قليل ومع التمرين المستمر تقدر تشيل اوزان عاليه ,,, وعاليه جدا .
– الصبر و الاستمرار ,,, تستمر ع تمرينك وع تركيزك فى التمرين ,,, هتلاقي يوم على يوم كفاءة جسمك تعالي ويتطور اكتر واسرع .
– اعصابك محتاجه تكون فى أقوى كفاءة ,,, عشان هي أساس تنشيط وصلابة عضلاتك
فبناء عليه :-
تبعد عن اى عادة وتضر بالأعصاب .
= تبعد عن اى توتر او نرفزة او زعل ,,, خصوصا قبل التمرين .
= تبعد عن قلة النوم والإرهاق الشديد .
= تغذي اعصابك بالفاكهة المنوعة ,,, والخضار الطازجة .
= تاخد مجموعة فيتامينات ب
B 12 – 3 – 6 -9
,,, سواء على هيئة حقنة مرة كل اسبوع او 10 ايام
أو ع هيئة كبسول مرة كل يوم او يومين .
ملحوظات :-
“”” الرعشة دي مش حاجة للناس المبتدئة بس ,,, دي ممكن تحصلك ف اى وقت
لو انت بتزود وزن لاول مرة ” يعني بتكسر وزنك وبتلعب بوزن جديد عليك “
او انت بتعرض اعصابك للارهاق والضعف ,,, عن طريق اى حاجة من ال قولناها فوق “””
“”” الرعشة مش بس لتمارين المقاومة وتمارين الجيم ,,, الرعشة ممكن تحصل فى اى تمرين وزن الجسم ,,, زي تمارين البلانكس
Planks
وبرده بنفس الفكرة ,,, فكل الموضوع موضوع وقت وصبر واستمرار “””
“”” الرعشة مش لازم تحصل فى كل عضلات الجسم ,,, ف عضلات ممكن تكون قوية عندك اكتر من التانية ,,, زي الشاب بتاع القهوة ال قوة الساعد وعضلات ايده 10/10
لكن لو جرب يلعب مثلا تمرين صدر بالبار هيلاقى فى رعشه ,,, عشان عضلات الصدر وعضلات الكتف ضعاف لسه “””
“”” حقنة الأعصاب زي
Becozyme
Depovit
تقدر تاخدها مرة كل اسبوع او 10 ايام ,,, هتساعد معاك جدا فى كفاءة اعصابك “””
“”” الكبسولات زي
Vitamax
Vitamax-plus
أو الحاجات المستوردة زي
Centrum
Optimen
تقدر تمشي عليها كورس كامل مع نظامك الغذائي والتدريبي ,,, تاخد كبسولة او جرعه كل يوم او كل يومين “””
“”” الحقنة او الكبسولات ,,, لكن متاخدش الاتنين مع بعض ,,, والحقنة أو الكبسولات دي حاجة عباره عن غذاء إضافي ,,,
ومفيش منها اى قلق او ضرر طالما جسمك محتاجها ,,, فأنت
عشان تاخدها لازم تكون بتتمرن واعصابك وعضلاتك محتاجة الغذاء دا ,,, يعني دي حاجات للناس ال بتتمرن فقط “””
” وبتمشي ع الحقنة اوى الكبسولات شهرين وتوقف شهر , وهكذا ,
تعمل فترة توقف
كل شهر ونص – شهرين او 3 شهور , والتوقف بيكون اسبوعين ع الاقل , او 3 – 4 اسابيع “
“”” موضوع الرعشة ليه جانب ذهني ونفسي ف الاساس ,,,
استمرارك فى التمرين و تركيزك في التمرين ,,, مع البعد عن أى شيء سلبي يؤثر عليك بالسلب , مع تغذية مظبوطة صحيحة = نجاح وكفاءة 100% “””
